СТОП ЗА УНИШТУВАЊЕТО НА ВОДНО!

Почитувани,

Интензивните градежни активности кои се одвиваат на планината Водно претставуваат причина за голема загриженост кај голем број граѓани од нејзиното забрзано уништување. Сведоци сме на прекумерната урбанизација, сечењето на шумата, изградбата на бројни објекти и сообраќајници на планината која е најблиското место за рекреација на чист воздух и најдостапна за граѓаните од сите социјални категории. 

Парк-шумата Водно е засадена и постои за да го заштити Скопје од загадувањето на воздухот, од високите температури, од пороите кои низ историјата го поплавувале главниот град. Сакаме да го искажеме незадоволството што се уништува цела планина која многу значи за здравјето на сите нас! Загаденоста на воздухот во Скопје неколкупати ја преминува горната дозволена граница, особено во зимскиот период, што го карактеризира Скопје како високозагаден град. Резултат на тоа е континуираното зголемување на болести кои се директна последица на оваа појава, пред сѐ, пулмолошките заболувања.

Затоа, ние, граѓаните, љубителите на природата, планинарите, екологистите, биолозите, спортистите, ректреативците... сакаме да Ви кажеме на Вас, надлежните за Водно, на надлежните за изградба на сите веќе почнати и идни познати и се уште непознати проекти – СТОП!

СТОП ЗА СИТЕ ГРАДЕЖНИ АКТИВНОСТИ НА ВОДНО!

СТОП ЗА ГРАДЕЊЕ КОМЕРЦИЈАЛНИ ОБЈЕКТИ НА ВОДНО!

СТОП ЗА ПРОБИВАЊЕ НА ПАТИШТА НИЗ ВОДНО!

СТОП ЗА СЕЧЕЊЕ НА ШУМАТА НА ВОДНО!

СТОП ЗА УНИШТУВАЊЕ НА СПОКОЈОТ И НА ЖИВЕАЛИШТАТА НА ЖИВОТНИТЕ НА ВОДНО!

ИТНО ДЕФИНИРАЊЕ НА ГРАНИЦИТЕ НА ПАРК ШУМАТА ВОДНО И НЕГОВО СТАВАЊЕ ПОД ЗАШТИТА НА ДРЖАВАТА!

Не сакаме ски-патеки, сообраќајници, паркинзи, ресторани, зголемен проток на возила... Сакаме да се рекреираме и да уживаме во тишината и убавината на нашето Водно. ДА ГО ВРАТИМЕ МИРОТ И СПОКОЈОТ НА ПЛАНИНАТА! ВОДНО НИКОГАШ ПОВЕЌЕ ДА НЕ БИДЕ ГРАДИЛИШТЕ!